śrī bhadrakālī stutiḥ

One should recite the Shri Bhadrakali Stuti at home before the idol or picture of Maa Bhadrakali, lighting a lamp, wearing clean clothes, and with full devotion; it is especially auspicious to recite it on Tuesdays, Fridays, Amavasya, or during Navratri. Regular chanting of this stuti removes fear, negative energies, and obstacles, enhances mental peace, courage, and confidence, brings prosperity, protection, and family happiness, and establishes the divine grace and protection of Goddess Bhadrakali for the devotee.

 

 

 

brahmaviṣṇu ūcatuḥ |
namāmi tvāṁ viśvakartrīṁ parēśīṁ
nityāmādyāṁ satyavijñānarūpām |
vācātītāṁ nirguṇāṁ cātisūkṣmāṁ
jñānātītāṁ śuddhavijñānagamyām || 1 ||

pūrṇāṁ śuddhāṁ viśvarūpāṁ surūpāṁ
dēvīṁ vandyāṁ viśvavandyāmapi tvām |
sarvāntaḥsthāmuttamasthānasaṁsthā-
-mīḍē kālīṁ viśvasampālayitrīm || 2 ||

māyātītāṁ māyinīṁ vāpi māyāṁ
bhīmāṁ śyāmāṁ bhīmanētrāṁ surēśīm |
vidyāṁ siddhāṁ sarvabhūtāśayasthā-
-mīḍē kālīṁ viśvasaṁhārakartrīm || 3 ||

nō tē rūpaṁ vētti śīlaṁ na dhāma
nō vā dhyānam nāpi mantraṁ mahēśi |
sattārūpē tvāṁ prapadyē śaraṇyē
viśvārādhyē sarvalōkaikahētum || 4 ||

dyaustē śīrṣaṁ nābhidēśō nabhaśca
cakṣūṁṣi tē candrasūryānalāstē |
unmēṣāstē suprabōdhō divā ca
rātrirmātaścakṣuṣōstē nimēṣam || 5 ||

vākyaṁ dēvā bhūmirēṣā nitambaṁ
pādau gulphaṁ jānujaṅghastvadhastē |
prītirdharmō:’dharmakāryaṁ hi kōpaḥ
sr̥ṣṭirbōdhaḥ saṁhr̥tistē tu nidrā || 6 ||

agnirjihvā brāhmaṇāstē mukhābjaṁ
sandhyē dvē tē bhrūyugaṁ viśvamūrtiḥ |
śvāsō vāyurbāhavō lōkapālāḥ
krīḍā sr̥ṣṭiḥ saṁsthitiḥ saṁhr̥tistē || 7 ||

ēvambhūtāṁ dēvi viśvātmikāṁ tvāṁ
kālīṁ vandē brahmavidyāsvarūpām |
mātaḥ pūrṇē brahmavijñānagamyē
durgē:’pārē sārarūpē prasīda || 8 ||

iti śrīmahābhāgavatē mahāpurāṇē brahmaviṣṇukr̥tā śrī bhadrakālī stutiḥ |