श्री श्यामला अष्टोत्तरशतनाम स्तोत्रम् – २

अस्य श्रीश्यामलाष्टोत्तरशतनामस्तोत्र महामन्त्रस्य, महाभैरव ऋषिः, अनुष्टुप् छन्दः, श्रीमातङ्गीश्वरी देवता, आदिशक्तिरिति बीजं, सर्वकामप्रदेति शक्तिः, परञ्ज्योतिः स्वरूपिणीति कीलकं, श्यामलाष्टोत्तरशतनाम जपे विनियोगः ।

नमस्तेऽस्तु जगद्धात्रि मातङ्गीश्वरि ते नमः ।
श्यामले जगदीशाने नमस्ते परमेश्वरी ॥ १ ॥

नमस्तेऽस्तु महाकृष्णे सर्वभूषणसम्युते ।
महादेवि महेशानि महादेवप्रिये नमः ॥ २ ॥

आदिशक्तिर्महाशक्तिः पराशक्तिः परात्परे ।
ब्रह्मशक्ते विष्णुशक्ते शिवशक्ते नमो नमः ॥ ३ ॥

नमोऽमृतेश्वरी देवि नमः परशिवप्रिये ।
ब्रह्मरूपे विष्णुरूपे शिवरूपे नमोऽस्तु ते ॥ ४ ॥

सर्वकामप्रदे तुभ्यं सर्वसिद्धिप्रदे नमः ।
सर्वसम्पत्प्रदे नॄणां सर्वराजसुशङ्करि ॥ ५ ॥

स्त्रीवशङ्करि वन्दे त्वां नमो नरवशङ्करि ।
देवमोहिनि सेवे त्वां सर्वसत्त्ववशङ्करि ॥ ६ ॥

नमः शाङ्करि वाग्देवि सर्वलोकवशङ्करी ।
सर्वाभीष्टप्रदे नित्ये नमो मातङ्गकन्यके ॥ ७ ॥

नमो नीलोत्पलप्रख्ये नमो मरकतप्रभे ।
नीलमेघप्रतीकाशे इन्द्रनीलसमप्रभे ॥ ८ ॥

नमश्चण्ड्यादिदेवेशि दिव्यनारीवशङ्करी ।
नमस्ते मातृसंस्तुत्ये जये ते विजये नमः ॥ ९ ॥

भूषिताङ्गि महाश्यामे महारामे महाप्रभे ।
महाविष्णुप्रियकरी सदाशिवमहाप्रिये ॥ १० ॥

रुद्राणी सर्वपापघ्नी कामेश्वरि नमोऽस्तु ते ।
शुकश्यामे लघुश्यामे राजवश्यकरी नमः ॥ ११ ॥

वीणाहस्ते नमस्तुभ्यं नमो गीतरते सदा ।
सर्वविद्याप्रदे तुभ्यं नमः शक्त्यादिपूजिते ॥ १२ ॥

भजेऽहं वेदगीते त्वां देवगीते नमो नमः ।
शङ्खकुण्डलसम्युक्ते बिम्बोष्ठी त्वां भजाम्यहम् ॥ १३ ॥

रक्तवस्त्रपरीधाने गृहीतमधुपात्रके ।
मधुप्रिये नमस्तुभ्यं मधुमांसबलिप्रिये ॥ १४ ॥

रक्ताक्षी घार्णमानाक्षी स्मितेन्दुमुखि संस्तुते ।
कस्तूरीतिलकोपेते चन्द्रशीर्षे जगन्मये ॥ १५ ॥

नमस्तुभ्यं महालक्ष्मि कदम्बवनसंस्थिते ।
महाविद्ये नमस्तुभ्यं स्तनभारविराजिते ॥ १६ ॥

हरहर्यादिसंस्तुत्ये स्मितास्ये त्वां भजाम्यहम् ।
नमः कल्याणदे पुंसां कल्याणि कमलालये ॥ १७ ॥

महादारिद्र्यसंहर्त्री महापातकदाहिनी ।
महाज्ञानप्रदे नॄणां महासौन्दर्यदे नमः ॥ १८ ॥

महामुक्तिप्रदे वाणि परञ्ज्योतिः स्वरूपिणि ।
चिदानन्दात्मिके तुभ्यं नमोऽलक्ष्मीविनाशिनि ॥ १९ ॥

भक्ताऽभयप्रदे नित्यमापन्नाशिनि ते नमः ।
नमस्तेऽस्तु सहस्राक्षि सहस्रभुजधारिणी ॥ २० ॥

मह्याः शुभप्रदे तुभ्यं भक्तानां मङ्गलप्रदे ।
नमोऽस्त्वशुभसंहर्त्री भक्ताष्टैश्वर्यदे नमः ॥ २१ ॥

नमो देव्यै नमस्तुभ्यं नमस्ते मुखरञ्जिनी ।
जगन्मातर्नमस्तुभ्यं नमस्ते सर्वनायिके ॥ २२ ॥

नमः परापरकले परमात्मप्रिये नमः ।
नमस्ते राजमातङ्गी नमस्तुभ्यं नमोऽस्तु ते ॥ २३ ॥

फलश्रुतिः –
नाम्नामष्टोत्तरं पुण्यं श्यामलाया इतीरितम् ।
प्रजपेद्यो नरो भक्त्या सर्वपापैर्विमुच्यते ॥ २४ ॥

व्याचष्टे सर्वशास्त्राणि महावागीश्वरो भवेत् ।
सकृच्छ्रवणमात्रेण गुह्याद्द्वे च चतुष्टयम् ॥ २५ ॥

सर्वलोकान् वशीकुर्यात् कान्त्या विष्णुसमो भवेत् ।
लभते महतीं लक्ष्मीं दैवतैरतिदुर्लभाम् ॥ २६ ॥

अणिमादिगुणैश्वर्यं स लभेच्छीघ्रमेव हि ।
जातिस्मृतिर्भवेच्छीघ्रं सर्वविद्यानिधिर्भवेत् ॥ २७ ॥

प्राप्नोति परमं ज्ञानं सर्वदा सुखमश्नुते ।
सर्वत्र स भवेत्पूज्यः सर्वत्र विजयी भवेत् ॥ २८ ॥

भूतप्रेतपिशाचादि भयं तस्य न जायते ।
महतीं कीर्तिमाप्नोति लभेद्योगमनुत्तमम् ॥ २९ ॥

घटिकापादुकाद्यष्टसिद्धिनाथो भवेदयम् ।
मङ्गलानि भवेन्नित्यं स महापण्डितो भवेत् ॥ ३० ॥

लभते महदायुष्यं लोकसम्मोहनो भवेत् ।
लभेदन्ते महादेवरूपं नात्र विचारणा ॥ ३१ ॥

इति श्री श्यामलाष्टोत्तरशतनाम स्तोत्रम् ॥