श्री लक्ष्मी स्तोत्रम् (त्रैलोक्य मङ्गलम्)

श्री लक्ष्मी स्तोत्रम् (त्रैलोक्य मङ्गलम्) देवी लक्ष्मी को समर्पित एक अत्यंत महत्वपूर्ण स्तोत्र है। इसे “त्रैलोक्य मङ्गलम्” इसलिए कहा जाता है क्योंकि यह स्तोत्र तीनों लोकों – स्वर्ग, पृथ्वी और अधोलोक – में सौभाग्य और समृद्धि का कारण माना जाता है। इस स्तोत्र का नियमित पाठ करने से धन, वैभव, ऐश्वर्य और जीवन में सुख-शांति की प्राप्ति होती है। यह स्तोत्र भक्त को देवी लक्ष्मी की विशेष कृपा और संरक्षण भी प्रदान करता है।

 

 

 

नमः कल्याणदे देवि नमोऽस्तु हरिवल्लभे ।
नमो भक्तिप्रिये देवि लक्ष्मीदेवि नमोऽस्तु ते ॥ १ ॥

नमो मायागृहीताङ्गि नमोऽस्तु हरिवल्लभे ।
सर्वेश्वरि नमस्तुभ्यं लक्ष्मीदेवि नमोऽस्तु ते ॥ २ ॥

महामाये विष्णुधर्मपत्नीरूपे हरिप्रिये ।
वाञ्छादात्रि सुरेशानि लक्ष्मीदेवि नमोऽस्तु ते ॥ ३ ॥

उद्यद्भानुसहस्राभे नयनत्रयभूषिते ।
रत्नाधारे सुरेशानि लक्ष्मीदेवि नमोऽस्तु ते ॥ ४ ॥

विचित्रवसने देवि भवदुःखविनाशिनि ।
कुचभारनते देवि लक्ष्मीदेवि नमोऽस्तु ते ॥ ५ ॥

साधकाभीष्टदे देवि अन्नदानरतेऽनघे ।
विष्ण्वानन्दप्रदे मातर्लक्ष्मीदेवि नमोऽस्तु ते ॥ ६ ॥

षट्कोणपद्ममध्यस्थे षडङ्गयुवतीमये ।
ब्रह्माण्यादिस्वरूपे च लक्ष्मीदेवि नमोऽस्तु ते ॥ ७ ॥

देवि त्वं चन्द्रवदने सर्वसाम्राज्यदायिनि ।
सर्वानन्दकरे देवि लक्ष्मीदेवि नमोऽस्तु ते ॥ ८ ॥

पूजाकाले पठेद्यस्तु स्तोत्रमेतत्समाहितः ।
तस्य गेहे स्थिरा लक्ष्मीर्जायते नात्र संशयः ॥ ९ ॥

इति त्रैलोक्यमङ्गलं नाम श्री लक्ष्मी स्तोत्रम् ।